ads
ads

قصيدة " زهايــمر"

قسمت يمين تلاتة ..
وبحارب بإستماتة ..
لملمت الشوق في قلبي ..
وعملتُه خيال مآتة ..
ورميت كُل الهدايا ..
ومسحت الألبومات ..
ورميت الناس ورايا ..
وقتلت الذكريات ..
بطّلت أشرب سجاير ..
وأطرد دُخّان دواير ..
علّقت كمان ستاير ..
على شباك الحنين ..
وحلقت ووشّى نوّر ..
من باب كسر الروتين ..
ورسمتك بالرُصاص ..
ومسحتك وبتمادي ..
علشان أقنع فى عقلي ..
اننا راح ننسى عادي ..
وخلاص أقنعت قلبي ..
إن آخرنا الليلادى ..
ونزلت الصُبح بدري ..
واثق جدًّا وهادي ..
فقابلتك تاني صُدفة ..
على كورنيش النوادي ..

أنا أصلاً م الحدايق ..
كان إيه جابني المعادي !!؟

ads